समाचार

नयाँ चालक अनुमतिपत्रका लागि परीक्षा खुलाउने तयारी

काठमाडौं ,पौष १५। नौ महिनादेखि बन्द रहेको नयाँ चालक अनुमतिपत्रका लागि परीक्षा खुलाउन तयारी सुरु गरिएको छ । नेपालमा गत चैतमा कोभिड–१९ को संक्रमण देखिन थालेसँगै सरकारले नयाँ अनुमतिपत्रका लागि परीक्षा स्थगित गरेको थियो ।

यातायात व्यवस्था कार्यालयसँगको समन्वयमा यातायात व्यवस्था विभागले नयाँ अनुमतिपत्रका लागि आवेदन लिन थालिएको विभागले जनाएको छ ।

नयाँ अनुमतिपत्रका लागि ‘सफ्टवेयर’ र छपाइको काम विभागले गर्दै आएको छ भने प्रदेश सरकारअन्तर्गतका कार्यालयले परीक्षा सञ्चालन र अनुमतिपत्र वितरण गर्छन् ।

अहिले प्रदेश सरकारले अनुमतिपत्रका लागि परीक्षा लिन चाहेकाले आवेदन खुलाइएको विभागका महानिर्देशक गोगनबहादुर हमालले बताए । उनका अनुसार सातओटै प्रदेशले नयाँ अनुमतिपत्र खुलाउने भएका छन् ।

उनले भने, ‘‘सेवाग्राहीले आफ्नो अनुकूल मिलाएर अनलाइनमार्फत् फारम भरेर परीक्षामा समावेश हुन सक्नुहुन्छ ।’’

एकान्तकुनास्थित यातायात व्यवस्था कार्यालयका प्रमुख सम्बरबहादुर कार्कीले मंगलबारदेखि फारम लिन थालिएको भए पनि केही दिनपछि मात्रै परीक्षा लिइने बताए ।

कोभिड–१९ को जोखिम कायम रहेकाले भिडभाड कम हुनेगरी लिखित र प्रयोगात्मक परीक्षा लिइने उनको भनाइ छ । उनले भने, ‘‘एक दिनमा निश्चित संख्यामा मात्रै सेवाग्राही आउने गरी व्यवस्था मिलाइनेछ ।’’

कार्यालयले गत चैतदेखि नै नयाँ अनुमतिपत्रका लागि परीक्षा लिएका थिएनन् । यसबीचमा पनि अनुमतिपत्र नवीकरण र वितरणको काम भने भइरहेको थियो । लामो समयसम्म अवरुद्ध सेवा एकै्पटक खुलाउँदा भिड हुने भएकाले  निश्चित संख्यामा मात्रै सेवाग्राही आउने गरी व्यवस्था मिलाउन लागिएको हो ।

Related Articles

Back to top button
%d bloggers like this: