समाचार

खेती गर्न अब ‘खेताला’ नचाहिने, कम्बाइन मेसिनले किसानलाई सजिलो(भिडियो)

कपिलबस्तु, कात्तिक १९ । कम लागत र कम समयमै खेतीपाती गर्न पाएपछि कपिलबस्तुका किसान दंग छन् ।

धान काटेर भित्र्याउनका लागि गाउँगाउँ पुगेर खेताला खोज्ने झन्झटबाट किसान मुक्त हुन थालेका छन् ।

धान रोपाईं गरेदेखि भित्र्याउँदासम्मको लगानी हर्दा किसानहरु आधुनिक मेशिन कम्बाईनतर्फ आकर्षित भएका हुन् ।

बिहानदेखि रात नपरेसम्म खेतमै ब्यस्त रहने किसान अहिले आधुनिक धान स्याहार्ने मेसिन गाउँमै आएपछि दिनचर्यामा परिवर्तन आएको छ ।

कपिलबस्तुका अधिकांश युवा मजदुरीका लागी भारत तथा अन्य मुलुकमा धाउन थालेपछि किसानको घरमा कि त बालबच्चा कि त बृद्धबृद्धा रहने गर्छन, त्यहि सिमित जनशक्तिको अभावलाइ सम्हालेको छ कम्बाइन मेसिनले ।

धान रोपाइ गरेदेखि स्याहार्दा सम्मको लगानीलाई मध्यनजर गर्दै किसानहरु आधुनिक मेशिन कम्बाईनतर्फ आर्कषित भएका हुन् ।

केहि बर्ष अघिसम्म ट्याक्टर, राँगा, गोरु र मजदुरबाट धानको कटाई र दाई गर्दै आएका कृषकहरु अहिले झञ्झटबाट मुक्त भई आधाभन्दा बढी बचत गर्दैछन् ।

धान काट्ने, सुकाउने, केलाउने र स्याहार्ने झन्झटिलोमै ब्यस्त किसानहरुको लागत समेत उठ्न धौधौ पर्ने गर्थ्र्यो, त्यो समय, जुन बेला भुस उठाउने पंखाको सहाराले धान स्याहार्ने गरिन्थ्यो ।

पैसा पनि कम लाग्ने र समय पनि बचत हुने भए पछि धेरै कृषकहरुले हिजोआज मेसिनबाटै धानबाली स्याहारी रहेका छन् ।

जिल्लामा अहिले दुई दर्जन बढी धान काट्ने आधुनिक कम्बाईन हारबेस्ट भित्रिए पछि कृषकहरुलाई निकै सजिलो भएको छ ।

मेसिनले एक घण्टामै ४ देखि ६ बिगहासम्म खेतको धान काटेर मेसिन भित्रै दाई गरेर धानका गेडा बाहिर फाल्ने गर्छ ।

मेसिनमा रहेको उपकरणले दाई गरे पछि धान सोझै टयाक्टर ट्रली र गोरु गाडा अथवा सोझै बोरामा राख्ने गरेकाले थप सुबिधा पुर्‍याएको छ ।

खेतमा हिलो अथवा पानी नभएमा सबै ठाउमा गई धान काटन सकिन्छ ।

कपिलबस्तु नगरपालिका वडा नं. ९ महुवा स्थित मुस्कान कृषि सहकारी संस्थाका अध्यक्ष बृजबिहारी चौधरीले मजदुर नपाउँदा मेसिनबाट धान कटाई गरेर दुई दिनमै स्याहारेको र आधी बढी सस्तो अनि समयको समेत बचत भएको बताउँछन् ।

खेताला राखेर धान काट्दै एक बिगहालाई १ हजार पाँच सय बढी खर्च पर्ने भए पनि मेसिनबाट काट्दा ८ सय मै पुग्ने अर्का कृषक मुकेश श्रीवास्तव बताउँछन् ।

यस बर्ष जिल्लामा ७२ हजार हेक्टर क्षेत्रफलमा गरिएको धान खेतीबाट २ लाख बढी मेट्रिक टन धान उत्पादन हुने अनुमान जिल्ला कृषि कार्यालयले गरेको छ ।

Related Articles

Check Also
Close
Back to top button
%d bloggers like this: