विश्वसमाचार

कोरोना त्रास : बंगाल सरकारद्वारा काँकडभिट्टाबाहेक सबै नाका बन्द

Spread the love

चैत २,  भद्रपुर । विश्वभर फैलिरहेको कोरोना भाइरस  (कोभिड– १९) को संक्रमण रोकथामका लागि भारतको पश्चिम बंगाल सरकारले नेपालसँग जोडिएको काँकडभिट्टाबाहेक सबै नाका बन्द गरेको छ। बङ्गाल सरकारले शनिबार इलामको पशुपतिनगर नाका बन्द गरेकोमा आइतबारदेखि काँकडभिट्टाबाहेक सबै नाका बन्द गरिसकेको जनाइएको छ।

भारतको विहार सरकारले भने अहिलेसम्म कुनै नाका बन्द गरेको छैन। झापा जिल्लासँग भारतको बङ्गाल र विहार राज्य जोडिएको छ। बङ्गालसँग काँकडभिट्टा र भद्रपुर नाका पर्छ। विहारसँग भद्रपुरसहित केचना, कुमरखोद, गौरीगञ्ज नाका पर्छ।  बङ्गालले काँकडभिट्टाबाट भारत आवतजावत गर्ने नागरिकको ज्वरो नाप्न थर्मल गर्नबाट स्वास्थ्य परीक्षण गरेर मात्र प्रवेश गर्न दिइरहेको छ। भद्रपुर नाकाबाट बङ्गालतर्फ जाने नागरिकलाई आइतबार बिहानदेखि प्रवेशमा रोक लगाइसकेको प्रहरी कार्यालय झापाका प्रहरी नायव उपरीक्षक महेन्द्रकुमार श्रेष्ठले जानकारी दिए। बङ्गालले नाका बन्द गरे पनि त्यसको असर भद्रपुरमा परेको छैन ।

विहारबाट कोरोना भाइरसको परीक्षण गरेर निर्वाध रूपमा दुवै देशका नागरिक आवतजावत गरिरहेका छन्। भद्रपुर नाका बन्द गराउने बारेमा केन्द्रीय सरकारबाट भारतीय एसएसबीलाई अहिलेसम्म आधिकारिक जानकारी नआएको बताइएको छ। भद्रपुरसँग विहारसँग जोडिएका केचना, कुमरखोद, गौरीगञ्ज नाका पनि खुल्ला छन्। ती नाकाबाट पनि स्थानीय आवतजावत गरिरहेको प्रहरी कार्यालय झापाका प्रहरी उपरीक्षक कृष्णप्रसाद कोइरालाले जानकारी दिए। उनका अनुसार झापा यी नाकाबाट आइतबार ९ हजार २ सय ७३ जनाको स्वास्थ्य परीक्षण गरिएको छ। त्यसमध्ये १० पुरुष र २ महिला गरी १२ जना भारतीय नागरिकमा उच्च ज्वरो देखिएपछि भारत फिर्ता पठाएको उनले बताए। ‘झापामा कुनै नाका बन्द भएको छैन,’ उनले भने, ‘काँकडभिट्टा, भद्रपुरसहित सबै नाका खुल्ला छ।’

Related Articles

Back to top button