अन्य

नेपाल जान पाए बाँच्थें कि भनेकी बहा मुर्मुकाे कुवेतमै निधन

Spread the love

कात्तिक १८– ‘नेपाल पुग्न पाए निको हुने थिएँ कि’ केहि समय अघि आफ्नो अवस्था बुझ्न अस्पताल पुगेका नेपालीलाई बहा मुर्मुले भन्नुभएको वाक्य हो यो । उहाँलाई नेपाल फर्किन पाए बाँचिन्थ्यो कि भन्ने आशा धेरै थियो ।

त्यसैले उहाँले सबैलाई आफूलाई घर फर्काइदिन सहयोग गर्न आग्रह गर्नुभएको थियो । तर उहाँको सपना पुरा भएन् । उहाँको उपचार गराइरहेको फर्वानिया अस्पतालमा स्थानीय समय अनुसार शुक्रबार राती १२ बजे निधन भएको छ ।

 

झापाको  शिवसताक्षी नगरपालिकाकी २९ वर्षिया मुर्मुको हृदयघातका कारण निधन भएको अस्पतालको भनाई उदृत गर्दै कुवेतमा रहेको नेपाली दूतावासले जनाएको छ । गएको अक्टोबर १ तारिखमा विरामी भएर सहयोग माग्दै दूतावास पुगेकी मुर्मुको फर्वानिया अस्पतालमा उपचार भइरहेको थियो ।

उहाँ विरामी भएर अस्पताल भर्ना हुँदा पनि परिवारको फोन नम्बर नभएकाले सम्पर्क हुन सकेको थिएन् । उज्यालो अनलाइनमा कुवेत पुगेकी मुर्मुसित घरको फोन नम्बर छैन, शरीर सुकेर कालो भईसक्यो शीर्षकको खबर प्रकाशित भएपछि परिवार सम्पर्कमा आएका थिए ।

झण्डै ४ वर्ष अघि घरेलु कामदारको रुपमा कुवेत पुगेकी बहा मुर्मु गैर कानूनी रुपमा बस्नुभएको थियो । दूतावासको सहयोगमा पहिलो पटक अस्पताल पुगेकी मुर्मुलाई डाक्टरले रक्तचाप कम भएको र शरीर कमजोर भएको भन्दै सामान्य औषधि दिएर पठाएको थियो ।

अस्पतालबाट दूतावासको सेल्टरमा पुगेकी मुर्मु फेरि बिरामी भएपछि फेरि फर्वानिया अस्पतालमै उपचारका लागि भर्ना गरिएको थियो । रक्तचाप र कमजोरीमा छालाको बिरामी पनि थपिएपछि उहाँको अवस्था जटिल भएको डाक्टरले बताएका थिए ।

उहाँले नेपाल पुग्न पाए निको हुने थिएँ भन्दै सहयोग गर्न आग्रह गरेको र परिवारले पनि घर फर्काइदिन आग्रह गरेपछि गैरआवासीय नेपाली संघ (एनआरएनए), राष्ट्रिय समन्वय परिषद् (एनसिसी) ले उहाँलाई नेपाल फर्काउन पैसा जुटाउन अभियान सुरु गरेको थियो ।

बहा मुर्मु हिँड्न नसक्ने अवस्थामा रहेकाले नर्ससँगै ह्विल चियर वा बेडसँगै पठाउनु पर्ने हुन सक्ने भएकाले ६५० देखी १ हजार दिनारसम्म लाग्न सक्ने र केयर गिभर पनि पठाउन परेमा खर्च अझै बढ्ने भन्दै संयोजक सुस्मिता लिम्बूले सहयोगका लागि सबैलाई अपिल पनि गर्नुभएको थियो ।

मर्मुको निधनपछि अभियान स्थगित गरिएको संयोजक लिम्बुले जानकारी दिनुभयो । अभियानका क्रममा उठेको रकम मुर्मुको शव नेपाल पठाउन र उहाँको काजकिरियाका लागि नेपाल पठाउने पनि लिम्बुले बताउनुभयो ।

उहाँको शव पोष्टमार्टम तथा आवश्यक प्रक्रियाका लागि आजै जाहारा अस्पताल पुर्याइएको  छ । आवश्यक प्रक्रिया पुरा गरी  शव नेपाल पठाईने नेपाली राजदूतावास कुवेतका श्रम सहचारी मनोज सिंहले जानकारी दिनु भएको छ ।

Related Articles

Check Also
Close
Back to top button