काठमाडौँ, जेठ १४ गते । मुस्लिम धर्मावलम्बीहरूको दोस्रो महान् पर्व बकर इद (इदुल जोहा) आज देशभर मनाइँदै छ । बिहीबार बिहानैदेखि मस्जिदमा पुगेर आफ्नो धर्मअनुसार नमाज पढी प्रार्थना गर्दै कुर्बानी दिएर यो पर्व धूमधामका साथ मनाउन थालिएको हो ।
इदुल फित्र अर्थात् रमजान पर्वको ७०औँ दिनमा बकर इद मनाउने धार्मिक परम्परा रहेको छ । यस दिन मुस्लिम धर्मावलम्बीहरूले बिहान स्नान गरी नजिकैको मस्जिद वा इदगाहमा गई सामूहिक नमाज पढ्ने गर्छन् । नमाजपछि एकआपसमा शुभकामना आदानप्रदान गर्ने चलन छ । त्यसपछि घरमा विभिन्न प्रकारका मिठाई, फलफूल तथा मासुका परिकार बनाई परिवारसँग खुसीपूर्वक खाने गरिन्छ । हिन्दु धर्मावलम्बीहरूले दशैँ मनाएझैँ मुस्लिम समुदायले पनि बकर इदलाई विशेष पर्वका रूपमा मनाउने गर्दछन् ।
यस अवसरमा काठमाडौँको घण्टाघरस्थित नेपाली जामे मस्जिद, काश्मीरी मस्जिद, स्वयम्भू जामे मस्जिद, खुसीबु जामे मस्जिद, इस्लामिक कल्चरल सेन्टर, मस्जिद–ए–बिलाल, मस्जिद–ए–उमरलगायत देशभरका मस्जिद तथा इदगाहमा मुस्लिम धर्मावलम्बीहरूको भीड लाग्ने गर्दछ ।
