काठमाडौं । सरकारले ल्याएको आर्थिक वर्ष २०८०/८१ को नीति तथा कार्यक्रम प्रतिनिधिसभाबाट बहुमतले पारित भएको छ । शनिबारको बैठकबाट नीति कार्यक्रम पारित गरिएको हो ।
त्यसअघि, सांसदहरूले विभिन्न विषयमा उठाएका प्रश्नहरूको प्रधानमन्त्री पुष्पकमल दाहाल ‘प्रचण्ड’ले जवाफ दिएका थिए ।
राष्ट्रपति रामचन्द्र पौडेलले यही जेठ ५ गते नीति तथा कार्यक्रम संसद्मा प्रस्तुत गरेका थिए । ७ गतेदेखि त्यसमाथि छलफल गरिएको थियो ।
सांसदहरूले नीति तथा कार्यक्रममाथि संशोधन प्रस्ताव पनि दर्ता गराएका थिए । शनिबारको बैठकमा उक्त संशोधन प्रस्ताव निणयार्थ पेस गरिएको थियो । बैठकबाट त्यसलाई अस्वीकार गरियो ।
त्यसपछि नीति तथा कार्यक्रम निर्णयार्थ प्रस्तुत गरिएको थियो । लगत्तै सभामुख देवराज घिमिरेले नीति कार्यक्रम बहुमतबाट पारित भएको घोषणा गरे ।
योसँगै सरकारलाई बजेट ल्याउन मार्ग प्रशस्त भएको छ । हरेक वर्ष जेठ १५ गते सरकारको वार्षिक बजेट संसद्मा प्रस्तुत गर्नुपर्ने संवैधानिक व्यवस्था छ ।
नीति तथा कार्यक्रम राष्ट्रियसभाबाट यसअघि नै पारित भइसकेको छ ।
नीति तथा कार्यक्रम पारितसँगै प्रतिनिधिसभाको बैठक आइतबार (भोलि) दिउँसो १ बजे बस्ने गरी स्थगित गरिएको छ ।
